1 Corinthians 16
Mipitanu Lamolii'a ta Mitema Noxou Lataua
1 aIoxe ano 'o vaikala sou lamoli ane mipitai'a ta mitema noxou Lataua. Nga'oxonu mii ma'ia e evikalane'i ta mitema e ilotu noxou Iesu no tuatuala no nano ne Xalatia sou i'oxonu. 2No anu voxo usoko sou voxosou lalotu utotomu, la ngingi vilevilesi ne ngamulaxu lamoli mose'i no pa'umolu. Pa'usou no nano no anu lamoliu e unono'u. Ngapitanu uai, mo sou eni ane'e la ataxusou la uasi. 3Xe no mine eni axali la alosi'a ta mitema ane ngingi ngesosovosi'a ne uoli voloxu sou vaikala lamana ilou lolovolo noxinge ne sou ilaixu ne Ielusalemu. 4Lexe anu laixe sou eni alai kalumo la ane'i ivaitaoleli.Kilaka Noxou Paulo
5 bEni Apolo alai ne Makedonia xe ili'i la sou ane'e noxinge. Xo eni Apolo alai aloxo ne Makedonia tei ne. 6 cMale eni axolu maxuveeni sevile noxinge male no 'a voxosou sivo mo tani lelemesou ne ukalu avile, mo sou ngingi ngasu'ulileli no anu muamua'i xo lexe sou alai ne'ei. 7Eni amasaxa sou amaisingesi vaimomo ne loxo exixaosingesi ka alai uasi, eni eloopala lexe axolu maxuveeni sevile noxinge, lexe Tila umasaxa aloxo ne. 8Ia eni axolu lai ne Epeso ne ulai utalo no 'a voxosou Pentikosi. 9 dXo aitenga tatila sou xaixai ane lexe eni axaxaisou ne anu mukisi noxilo, xe ta mitema tapiena ane sou ivikala no tumalilo ne ane'i a ixoxolu.10 eIo, lexe Timoti une'e la ngasaxila'u laixe lexe mii vile u'oxonu u'ume no mine anu uxoxolu noxinge ne mamu. Xo anu uxaxaisou xaixai noxou Tila, iou aloxo eni 'osi. 11 fEvile no voxo ane ne umomomo sou ngaitalonu ngalomuxu mo nga'osasou mamu. Ia no anu muamua'ixu sou ulivu une'e noxilo la nga'italonu no 'a opo se'isisi. Eni autiti'a ilo'a ta vimovimou.
12 gAno 'o ne vaikalasou vivinge Apolosi. Eni epeletotosi'a pekia'u sou lexe ulai noxinge ilo'a ta vivinge. Anu umasaxa sou ulai palea vaimomo 'o uasi, ia anu ulai no mine anu uxamulinu loxo voxo laixe noxou sou ulai.
13Ngatulu mo ngaloosinge, mo xavingengi voxovoxo no anu muxamuxaxu tangengi la sou ngaxali loxo ta mitema sou ngatulu peki'ainge mo nga'ume uasi. 14Nga'oxonu mimii ukalusi ne mo tanengexa'a ta menexine no anu alauna.
15 hNgingi ngelavu lexe ta temanu tani noxou Sutepano ne ane'i mixiu tei milai noxou Iesu no nano ne Akaia mo ane'i miitine'i milai no anu xaixai noxi'a ta mitema noxou Lataua. Ia ta vivilo eni apeletotosinge pekia'u, 16sou ngalu'engengi no laaxa'a ta mitema ane'i iou aloxo ne mo ane'i ukalusi e imuline'i sou isu'uli no anu xaixai ne. 17Eni e'osa no mine Sutepano ilou Potunatasi xe Akaikusi mixali xo ane'i mimomomosou mi'oxonu mii ane ne ngingi ta Kolinito nga'oxonu uasi. 18Xo ane'i mi'oxonu opoleli muai laixe mo noxinge kalumo. Ta mitema ane loxo ne umomomo sou talavusi'a laixe.
'Osa'ila Kaluxusou
19 iTa mitema ilotu noxou Iesu no xalee lia tila ne Asia mi'italonu 'osa'ila noxi'a mune'e noxinge. Akuila mo Pilisila miiongengi no nano no ualasou Tila, mo ane'i ta mitema e ilotu noxou Iesu ane ilavusou ipita no tani noxi'a ne kalumo. 20Ta vivinge mukalusi ane mixolu lai 'o mi'italonu 'osa'ila noxi'a mune'e noxinge. Ngasexelangenge ngatongato'o mo ngatimunu xalengengi no 'a 'osa'ila noxou Lataua.21Eni Paulo melo akaukavunu 'osa'ila ane 'o no avolo. 22 jLexe itema vile tanuxu Tila uasi, la uno'u tu'umaxu no voxo mine Tila ulivu une'e. Nini nane'e, Tila. 23Alauna noxou Tila Iesu uxolu noxinge. 24Tanutanuxu noxilo ulai noxinge ukalusi no nano noxou Kalisito Iesu. Manina.
Copyright information for
ATA